Ang Lima ka Buok Pan ug Duha ka Isda Uban sa Damgo sa Usa ka Batang Buluyagon

( A message I delivered during the Santacruzan sa Iglesia Filipina Independiente 2013 last May 30 at the Tayasan Municipal Trading Post .) 

(Greetings...) 

Niadtong panahon nga si Kristo nanginahanglan ug pagkaon aron ihatag sa kapin lima ka libo ka tawo, kinsa man ang wala magduha-duha pagtugyan sa unsa man nga anaa lamang kaniya? Kinsa man kato nga wala magduha-duha sa paghatag sa lima ka ukob nga pan ug duha ka buok isda? Ug sa makaulahi, kinsa man kato nga mitabang kang Hesus nga mapakita ang Iyang gahum aron mapakaon ang kapin lima ka libo?

Usa ka bata nga trese anyos. Usa ka bata nga sama niining mga naa sa atong atubangan nga atong pangisgan kung maglangas, sapoton ta kay samukan, apan luyo niana, adunay dakong katakus nga naa kanila nga wala kanato, nga maoy gikahimut-an sa Ginoo kanila. Ug mao kana ang ilang pagkamatinud-anon, pagkamanggihatagon sa uban ug pagkamasaligon sa Ginoo. Uban sab niining mga bataa, ang dakong paglaum sa kabag-ohan ug paglambo nga usahay, kita isip mga katigulangan, magduha-duha sa pagdawat.  

Niadtong pagpakaon ni Hesus sa lima ka libo, makita nato nga ang Diyos nga gamiton ang matag bata aron mapakita ang Iyang gahum dinhi kanato sa simbahan ug sa tibuok katilingban.

Sa makadaghan na nahitabo bisan pa sa panahon sa daang kasabotan sa Bibliya nga ang mga kabatan-onan nga ato dayon nga tawgon nga dili kabalo, nagpataka-taka, walay alam, maoy gigamit sa Ginoo aron magdala sa Iyang maayong balita sama ni Propeta Jeremias ug ni Propeta Samuel, ug gani sa Haring David nga mipildi sa higanteng si Goliath.

Kining mga tawhana dili mga perpekto, mga naay apan, pero ang Ginoo, mihimo kanila nga takus sa pag-alagad Kaniya ug sa iyang katawhan.

Sama niadtong trese anyos nga bata, ang nakalahi niining mga bata mao ang ilang walay pagduha-duha nga paghatag kung unsa man gani ang bisan gamay nga naa kanila. Kita man gud, naa kitay mga pagduha-duha sa atong pag-alagad bisan sa atong isigkatawo, ug sa atong Dios. Bisan man gani sa pag hatag ug panahon nga musimba o mualagad sa Diyos sa matag Dominggo. Ang mga bata ug sa ila pang sulti todo bigay gyud sa pag sayaw, pag-awit ug pag-alagad kung hatagan ug responsibilidad sa simbahan.

Pila ka tuig na ang milabay, adunay usa ka bata nga nagdamgo nga unta munindot ang mga awit sa Misa dinhi sa Parokya sa Tayasan. Usa ka bata nga buluyagon, walay batasan, babaon, palaaway ug gani yabag – apan naa siyay damgo nga iyang gibutang sa Iyang alimpatakan aron kini mabuhat niya sa umaabot nga panahon.

Tinuod gyud diay nga ang Ginoo mutawag dili sa mga perpekto apan himoon niyang takus ang tawo, ug gihinay hinay niya pagmatuto ang maong bata aron iyang mahimo ang iyang damgo nga dili iya lamang sa usa ka bata, apan dinhi misalmot usab ang Ginoo. Bag-ohon gyud sa Ginoo ang usa ka tawo ug gamiton niya kini nga mahimong instrumento sa panalangin alang sa ubang tawo.

Sa pag-abot sa tukma nga panahon, nahitabo ang damgo niya ug ang maong children’s choir nga iyang gihandum, midako ug nahimo kining bugtong pormal nga koro sa tibuok diocese. Pormal masulti kay anaa gyuy pormal nga voice assignments ug mao kana ang IFI Choristers nga karon nag saulog sa ikaunom nga tuig human kini nahimugso gumikan usab sa Flores de Mayo niadtong tuig 2007.

Ug niadtong miaging dominggo, nahimugso na usab ang Holy Trinity Young Voices nga maoy produkto sa usa ka bulan nga katesismo karon tuiga. Sila mao ang mag alagad kanato sa parokya pinaagi sa awit diha sa Balaang Misa.

Atong makita nga dinhi sa parokya sa Tayasan, ang Flores de Mayo dili kawang lamang. Dili lamang kini usa ka bulan nga pagtuon sa mga bata kung unsa ang atong pagtoo apan sila, gitudloan sa pag-alagad sa Ginoo, sa paghalad sa ilang mga talento kaniya, Siya nga mao usab ang gigikanan niini. Ug usab, ang usa ka bulan nga katesismo nanganak ug mga lideres dinhi sa atong mga kabatan-onan nga mao na unyay mupuli kanato sa pag-alagad sa atong simbahang pinangga, ang Iglesia Filipina Independiente.

Dako akong pagpasalamat kang Lola Linda ug Lolo Vencing Infante, nga maoy nidala kanako ug sa akong mga ig-agaw aron musimba sa matag Dominggo niadtong bata pa mi. Kay kung wala pami nila sige ug gidala, dili unta nako makit-an ang kakulangan sa atong Simbahan diha sa aspeto sa Liturgy and Music, ug unta wala ako magdamgo aron mapanindot ang atong pagsaulog sa Santos nga Misa diha sa mga awit nga makapadasig kanato.

Dili pa man gyud nako masulti nga ako successful na sa kinabuhi apan, niining puntoha samtang ako (nagsulti sa inyong atubangan karon), nga mao na katong batang buluyagon, nga tabian, nga mag-una una ug halad sa bulak, mag una una ug boluntaryo nga mukorona sa Birhen, ug makig ilog nga musolo sa pagpanamilit bisan yabag,

(Ako usab) nakahuna-huna ko kung asa kaha ko karon ug wala pa ko nagdako sa simbahan, ug unsa kaha ang akong kinabuhi karon? Sa tinood lang, dili gyud nako ma-imagine sa akong kaugalingon ug ang akong kinabuhi, kung ako wala pa nagtubo sa simbahan. Dili nako mapicture-out akong kaugalingon kung wala pa ko namatuto sa simbahan (diha sa kumbento ni Lolo Brix ug Lola Pang.)  

Gani, ang akong amahan ug inahan, dili na mangita nako kung wala ko sa balay, automatic na gyud na nga naa ko sa simbahan. Wala ko karon sa inyong atubangan unta karon kung wala ko magtubo diha sa simbahan nga maoy nagpalig-on kanako sa pag-atubang sa kalisud sa kinabuhi, nga ang atong unang daganan, mao ang Ginoo, nga mao ray naay gahum nga musulbad sa bisan unsang dako nga unos nga muabot kanato.

Ako usab muingon gayud nga ang akong leadership nagsugod gyud dinhi sa Flores de Mayo,ug tungod niana, naabot nako sa pagka SK ning maong lungsod, pero sa pagkahuman sa termino, balik gyud ako sa akong matawag nga first love: ang simbahan, nga dako ko ug utang kabubut-on labi na sa mga pari nga nilabay, ug nila manang racquel, nang raquesa, nang crismer, nong glensol ug kang nong jovie nga maoy naa sa akong likod kanunay ug usab kang lola panyang.  

Niining panahona, hatagi ko ninyo ug higayon nga mupasalamat sa akong ginikanan nga walay pagduha-duha nga musoportar sa akong pag-alagad sa Ginoo karon ug sa mga tuig nga nilabay. Sa ako pang gisulti didto sa Davao, dili ako ang founder sa choir sa Cathedral, kung dili si papa kay sa una namong pagsimba, nakita dayon niya nga kinahanglan gyud padasigon ug mag-organize ug choir didto ug ako kanang nahimo sa hapit duha ka tuig nako nga pagpundo didto. Sa ako pod nga mga igsoon, salamat kay gidungog sa Ginoo ang akong mga pag-ampo nga kitang tulo na gyud ang nag-alagad na sa Ginoo.

Ug sa katapusan, sa matag damgo sa usa ka bata sama nako, nagdala kini ug bag-ong paglaum sa simbahan, sama sa mga binhi nga itanom ug sa umaabot nga panahon, kini mamunga ug maghatag kanato ug bag-ong kinabuhi.

Hangyoon ko kamo nga ayaw ug i-look down ang mga gagmayng bata kay matag usa kanila adunay dakong damgo. Ang ilang mga paglaom gahatag kanato ug kasigurohan sa nabag-ong simbahan, nga puno sa kadagaya sa talento sa mga kabatan-onan. Dili usab kita maghunahuna nga negatibo nga kining mga bataa dili mausab sa umaabot nga panahon gumikan sa ilang pagka buluyagon.

Ang pag-usob sa usa ka tawo, nagsugod kung adunay usa nga mutoo kaniya nga dili siya puro lamang kabuluyagon ug salawayon, apan adunay maayo nga nahisulod kaniya. Nga siya naay naangkon nga pinasahing katakus aron magamit pag-alagad sa Dios ug sa iyang isigkatawo.

Sa matag bata nga muhalad sa iyang kaugalingon diha sa pag-awit, pagsayaw, pagbasa o sa bisan unsang paagi sa pag-alagad sa Diyos, nagdala kini ug bag-ong paglaum kanato.

Sa makausa pa, palihug atong padayonon sa pagsuporta ang Flores de Mayo o Vacation Church School ug hatagan nato ug dakong pagtagad ang ilang mga kinahanglan, kay kini mao ang atong investment sa umaabot nga panahon, nga maoy mupadayon sa pagdala sa Simbahan.

Mabuhi ang mga kabataan, mabuhi ang Iglesia Filipina Independiente! Ug sa mga katuigan pang muabot atong ipadayon pagsinggit, PRO DEO ET PATRIA!! PRO DEO ET PATRIA! Daghang Salamat ug maayong gabie.